Iulianus de Loba ad testimonium premissorum.

[145] Et nos Guigo Flandini decretorum doctor et sacrosancte
sedis apostolice ac domini nostri pape notarius, qui in sacrosancto

concilio generali, celebrato Perpiniani, Elnensis diocesis, in ecclesia. beate Marie de Regali, per eundem sanctissimum in Christo patrem et dominum nostrum dominum Benedictum divina providencia papam terciumdecimum, assistentibus sibi suo sacro collegio et aliis superius nominatis ac in omnibus eiusdem concilii sessionibus et publicacione presentis processus et aliis premissis, dum sic, ut premittitur, per prelibatum dominum nostrum papam et alios coram eo in prefato concilio agerentur, dicerentur, legerentur et fierent una cum dominis prelatis et aliis ac testibus supranominatis presentes fuimus et omnia, prout supra continentur, fieri, legi et dici in eodem concilio vidimus et audivimus ac in nota per modum processus de mandato ipsius domini nostri recepimus, ad maiorem premissorum roboris firmitatem habendam ac ut processui huiusmodi centum quadraginta quinque folia, isto incluso, continenti, tanquam vero et publico, ubique fides adhibeatur indubia, hic nos manu propria subscripsimus et signum nostrum consuetum apposuimus requisiti, in fidem et testimonium premissorum.

G[uigo].

Tandem vero prefatus dominus noster papa prorogavit sessiones dicti concilii seu continuavit dictum concilium, prout inferius continetur: In nomine Domini, amen. Notum sit universis presentibus pariter et futuris, quod anno a nativitate Domini millesimo quadringentesimo nono, indictione secunda, die vero vicesima sexta mensis marcii, hora terciarum vel quasi, pontificatus vero sanctissimi in Christo patris et domini nostri domini Benedicti divina providencia pape XIII quintodecimo, in villa Perpiniani, Elnensis diocesis, personaliter constitutus, prefatus dominus noster papa, de concilio reverendissimorum patrum dominorum sacrosancte Romane ecclesie cardinalium, presentibus reverendis patribus dominis patriarchis, archiepiscopis, episcopis, abbatibus et aliis in sacrosancto generali concilio congregatis, nolens idem dominus noster interrumpere concilium memoratum, ut, si que dubia interim occurrerent, possent facilius terminari et eciam ex aliis certis, iustis et racionabilibus causis utilitatem sacrosancte Romane ecclesie concernentibus, ad primam diem consistorialem post festum assumptionis [145] beate Marie proxime venturum cum continuacione dierum sequencium, sessionem eiusdem generalis concilii, quod in dicta villa Perpiniani celebrabatur, per ipsum dominum nostrum, tunc temporis continuavit ac etiam prorogavit; retento tamen, quod, ubi dicto domino nostro pro utilitate negociorum videretur dicta sessio medio tempore expedire, idem dominus noster posset ipsam anticipare vel ulterius prorogare, prout dictorum negociorum utilitas postularet. Eadem vero die et hora de consilio et in presencia predictorum, idem dominus noster voluit et eciam