PRAEFATIO. Ex tribus fontibus proveniunt epistolae pontificum Romanorum, quae sequuntur, ineditae: primum ex codicibus bibliothecae nationalis Parisinae, unde eas, quae ad historiam paparum illustrandam vel ad ius canonicum melius cognoscendum prodessent, aut ipse descripsi aut ab aliis describendas curavi posteaque contuli; deinde ex,,Collectione Britannica", cuius apographum in scrinio Societatis Monumentorum Germaniae asservatur. Ac si quid in edendis huius collectionis epistolis habeo meriti, attribuas velim V. Cl. Edmundo Bishop Londoniensi et Paulo Ewald Berolinensi, quorum ille codicem in Museo Britannico invenit descripsitque, hic eum ex parte publici iuris fecit uberrimisque notis ornavit in Neues Archiv der Gesellschaft f. ältere deutsche Gesch. V. 275 sq. Neque vero omnes in libro meo invenies collectionis Britannicae epistolas, sed tantummodo eas, quarum Ewaldus nec in Neues Archiv nec in Regestorum Pontificum Romanorum nova editione textum praebuit integrum. Tertius denique fons est codex collegii S. Trinitatis Cantabrigiensis, Alexandri III registri. fragmentum continens. De quo codice quoniam in Neues Archiv X. 586 fusius disserui, satis est hoc loco meminisse, septuaginta in eo inesse epistolas excepta una nondum notas (vide infra pagg. 129, 149-208). |