XII.

Autre document au sujet de la même affaire que la précédente. 30 MARS 1476.

Coppie faite par nous les bailli et gens du conseil de notre tres redoubté seigneur monseigneur de Liege ordoneis en sa Cité, extraite hors de notre auctenticque registre. Rechargement fait alle court de Hodege par nous, les bailly et gens du conseil susdit l'an quatuors cens et sassante sauze le penultienne jour de marce. Comme venerables seigneurs doyen et capitle delle eglise collegiaule Saint Denix en Liege, seigneurs dudit Hodege et leurs commis ou mambours euissent fait comandeir aux persones subescriptes, assavoir a Wauthier Soteal, Jehan Thibon, Herman Le Cerpentier, Wery Coweit, Wauthelet Le Kane, Jacquemin de Horion et autres manans et surceans de leur ditte haulteur de Hodege de payer cascun d'eaux trois florins de Rin d'amende ou eulx accordeis envers eaux les dits seigneurs partant qu'ils avoient mesamireit leur haulteur et seignorie, et procedeit allencontre de certains crys et publications qu'ils avoient par cidevant fait faire en leur ditte haulteur, pour obvier aux inconveniences qui y pooient advenir, mesmement partant que les aucuns deaux comme depart les dits seigneurs fut remostreit avoient sortenus et sortenteit de nuit et de jour les faiteurs, qui avoient enfraint et embrisiet leur ditte haulteur, et qui quassiet et navreit avoient Collart Proidhomme leur mayeur et son fil en excerchant son office, dont les aucuns avoient etez presens ou ledit mayeur et son dit fil avoient este quassiez, et ny avoient fait quelque deffence ne resistence, et plusseurs autres qui n'avoient fait quelque diligence de assisteir, ne de aidier gardeir la ditte haulteur, ains totalement este ausdits crys et publications desobeissans, qui fais estoient en grand bin publicquement pour tous surceans et autres wardeir davoy, sur quoy les personnes deseurnommeis alligoient cescun par ly plusseurs raisons, par lesqueles disoient que point n'estoient tenus des dittes amendes, les aucuns partant quils estoient hostes tenans tavernes, les autres partant que point ny estoient presens, et mesmement de la part de la generaliteit de la ditte ville estoit alligiet que les dits seigneurs n'avoient point puissance ne auctoriteit de faire faire cris ne publications en leur prejudice, ne pour asservir les dits surseans plus avant que loy ne pooit porteir. Sur lesquels differens pluseures provances, mostrances, debas, alligances et contremostrances en ont par les dittes parties et surceans allencontre des dits seigneurs esteit faites, lesqueles sour le chieff en la cause eslevé et obtenu la ditte cour apportat et exibuat en nos

mains. Sachent tuis que par nous bin et diligenment visenté les explois par ladite court en nos mains exibueis, entendut ossy le raport de la court auvec les remostrances d'une parte et d'autre, nous, sur tout ce, meurement conseilliez, avons dit et jugiez en rechargant la ditte court que ledit Wauthier Sotteal comme celi qui at les faiteurs sortenus, apres le fait perpetré en le personne dudit mayeur advenu et mesamireit le haulteur des dits seigneurs et le dit cry, item et les dits Jehan Tibou et Herman Le Cerpentier comme ceux qui estoient sour le place, ou le dit mayeur fut quassiez, sens faire diligence d'assistence, mesamirant ossi la ditte haulteur des dits seigneurs et ledit cry, sont tenus de payer cascun d'eaux trois les trois florins de Rin par les dits seigneurs demandeis, item et les dits Wery Coweit, Wauthelet Le Kanne et Jacquemin de Horion par vertut de leurs alligances et contremostrance, doient d'icelle amende et demandiese a eulx faite demoreir quittes et en paix, par les raisons en leurdittes alligances et contre mostrance contenuez par eulx provées et verifiez. Donneit par coppie subz les seelz messire Jacque de Morialmes seigneur de Merchenhoven, chevalier, souverain bailly de Liege, messire Gerar de Seraing, seigneur a Fraipont, pannetier hirtable a notre tres redoubté seigneur, aussy chevalier et Gerar Tollet, desquels usons ensemble en telz et semblan cas, sur l'an, mois et jour deseur escrips; Jo. de Resimont per registrum pro Platea.

Collégiale Saint-Denis. Copie originale avec fragment de deux sceaux en cire rouge et verte et paraphe du notaire. Liber secundus cartarum insignis ecclesiae collegiatae Sancti Dionisii Leodii, anno 1739, fol. 19 vo et 20.

XIII.

Amende honorable faite au chapitre de Saint-Denis par les habitants de Hodeige à cause des coups portés à leur maïeur et à son fils.

3 FÉVRIER 1476.

L'an 1476 de mois de feverier le troisseme jour, comparut pardevant nous mayeur et esquevins de la haulteur et justiche de Hodege, venerable, saige et discreit personne messire Pier de Wotteme, canone delle engliese collegiaul St Denis en Liege, liqueis la mesme et pour et en nom de venerables seigneurs monseigneur ly doien et capitle delle engliese collegiaule St Denis en Liege, comme signour de notre ditte haulteur de Hodege nous remonstrat comment Rauskin, fis Ernult de Marckeche de Hemericourt et Pas

queaul, fis Kochelet de Hemericourt et Hubin, cusin a Wilheme Batton et le bastart Johan, fis Henry Wilheame de Hemricourt, pour cause de la grande offense et forfaiture par eaux les dits faitueis faite a mes dits seigneurs de St Denis et alle personne de Collard le Preudhomme leur mayeur, et a son fis, en eccercant et faisant leur offiche et en gardant leur ditte haulteur de Hodege, s'est ilhe aussy que, en vertut de certaine traitiet et appointiment de paix faite envers mes dits seigneurs de St Denis par les dits faitules damende profitauble dont ensiwan li dit traitiet les dits faitules astoient et sont tenus de faire envers mes dits seigneurs de St Denis et de leur justiche de Hodeige, amende honorable laqueil amende honorable dissant ystre faite alle pryer et requeste de noble et honoreit damoiseault Ernult de Bierlo, escuyer, pour cause que le dit Damoiseaul dissoit les dittes faitules ystre alcunement en doubt de leurs corps de monseigneur le duc ou de ses offichiers par les dittes faitules en viez hour a St Lambert a Liege, le troisième jour de fevrier l'an susdit, et chu en le presenche de ly li dit messire Pier et de Jacque de Velroux, canone de la ditte eglise St Denis, chu accep tant en nom de mes dits seigneurs doien et capitle de St Denis et de Beaudewin, fis Colart le Proidhome, substitueit maieur de part son dit père de Hodeige, et de dit Collart le Proidhome et de Pirlot de Hodeige, nous confrere et conesquevin comme representans justiche en chi cas, et a sourplus suppliant par le dit maître Pire de Wotteme au dit Baldewin comme maieur substitueit, et a nos dit confrere et conesquevin que, en la maniere teil que la ditte amende honorable esteit faite par les dittes faitules ilz nous en fesissent rapport affin que de tout chu il en fuist memore a tousjours, et que tout chu fuist mis en ward de loy, sique la meisme nous dit substitueit mayeur et nos dit confrere et comme esquevin nous fissent rapport avoir esteit presens en les dittes quatre faitules devant nommez fissent envers seigneurs de St Denis et leur justice de Hodeige escusanche honorable, eaux inclinans de genous très humblement, et en priant merchis a mes dits seigneurs, et par eaux dissant qu'il astoient très dollant et repentans de tout leur cœur delle offense, par eaux faite, et que point nelle ont fait pour messamyret mes dits seigneurs de St Denis ne leur justiche, et que chu que fait avoient astoit apres vin et beweraige, et silhe l'avoient a faire jamais nelle feroient, ne comencheroient, laqueil obedienche et excusanche ausy faite, et a nous aussy faite rapport en notre xhame ou lieu acoustumeit, alle request dudit messire Pire en nom de mes dits seigneurs de S' Denis. Susdit Collart le Preudhomme notre soverain mayeur susdit et notre conesquevin le mist en le warde de nous les esquevins, qui a chu faire fummes presents assavoir summes: Collart le Preudhome, Pirlot de Hodege, Wery

Coweit de Hodege, Johan d'Omale clerq, Masset Polard, Gilet le Mariscaul d'Orey, Baldewin fis Godefroid de Doncheir le jouene, en signe de veriteit sour lan et jour devant escripts. Etoit signe a l'originel Jo. Darnale per registrum.

:

Ce que j'atteste Serv.-Jos. Henon notaire immatriculé de Liege

per copiam conformem in fidem subscr.

Liber secundus cartarum insignis ecclesiae collegiatae Sancti Dionisii Leodii, anno 1739, fol. 27.

XIV.

Comptes extraits du registre du luminaire et concernant la restauration de l'église de Hodeige.

1534-1559.

1534.

Item a Huibiert le Xhalteur, IX florins III aidans.

Item encor audit Huibier, VI florins.

Item pour le lougis de Xhalteur, II florins.

1536.

Premier pour x mod. de chasse a un aidans XII sols le mod., III florins XV aidans.

Item encor a Ernol le Kaine pour v mod. de chasse parmy le journez, III florins X aidans.

Item pour des piere de Sene (1) a Tongre, IIII florins V aidans. Item à Lambert le carpentier pour le owerage de boys, IX florins. Item pour les despins de ly et de ses valet pour IIII jornez ly III, et IIII jorney ly II, quy font XX jornez a VII aidans, VI florins X aidans.

Item à Lambert le machon, XII florins.

Item encour audit Lambert pour une journez, I florin.

Item a dispens dudit Lambert IX journez le III qui font XXVII journez, et cinq a Jehoulle quy font ensemble XXXII journez, a VII aidans montent IX florins IIII aidans XVIII sols.

Item a Vincent li mortir, XLV aidans.

Item a Huibert le xhalteur quil a recut à Liege, X florins. Item a Werdelle et a Weraz pour II cherz de pier, XVIII aidans.

(1) Il s'agit ici des pierres de sable extraites dans les carrières de Sussen (Sichen-Sussen-Bolré).

1542.

Item premier debourseit par la main Cochar enon de dit mambour a Libert le scailteux, XXVI florins.

Item encor debourseit a Ernult le trompet XXXVI aidans pour servir le masson.

Item encor debourseit à Johan pour unc journeez à tout le cheret, ung florin.

Item encor debourseit a Jehan le Bergier pour une scagne de schazes, XVI aidans.

Item encor debourseit a Stassin le mariscal XV aidans pour de l'ouvrage.

Item encor debourseit a Hubert le masson, v florins.

Item encor debourseit a scrinier, VIII florins et VI aidans et encor VIII aidans.

Item encor debourseit por de clous, LII aidans.

Item encor debourseit a scrinier, XIII florins et XV aidans et demi. Item encor debourseit a scrinier, IIII florins et X aidans et ung quart.

Item encor debourseit a scrinier, II florins et X aidans et demi. Item encor debourseit a masson pour unc journeez qu'il at este a Tongre aidiez quir le piere de Sene, v aidans et ung quart. Item encor a scrinier, IIII florins et ung quart.

Item encor debourseit a Stassin le marichal por de clous, VI aidans et demi.

Item encor debourseit a scrinier por IIII sty de wassend montent v florins XII aidans et encor XXXIX aidans de argent.

Item debourseit a Martin le charlier pour trois journeez, XXX aidans. Che sont le rest de l'an XV et XL, XLI, XLII,

1543.

Item debourseit a masson pour l'ouvraige quilz at fait devant le cemitiere II florins unc aidans et ung quart que ledit mambour dewait de reste de l'an XV et XLIII.

1544.

Item encor debourseit pour quatre muids de schass et ung sty, II florins ung patar et un quart.

Item encor debourseit pour XX blocs et demi de piere de Sene, VI florins et XIII aidans et demi.

Item a II journeez, IIII florins et encor a frais et despens ung florin.

Item debourseit pour XX blocqs de pier de Sene et pour les frais a Tongre, XVIII florins XI aidans.