12. An habeat Capitulum, et ex quot Canonicis constet. 13. An adsint Praebendae, et quae.

14. Quale servitium praestent Canonici Cathedrali; et an etiam fungantur munere Parochi in locis Dioecesis. 15. An resideant intra fines Parochiae.

16. An se immisceant in regimine Ecclesiae, et impediant liberam jurisdictionem Episcopi.

17. An habeat Seminarium, et ubi: quot Juvenes ibidem alantur, et quibus studiis vacent.

18. Num Concilii Trid. regulae circa Seminaria serventur. 19. An ibi adsint Parochi, vel tantummodo simplices Missionarii.

20. An Parochi sint perpetui, vel ad nutum amovibiles, et an Missam celebrent festis diebus pro populo.

21. An eligantur ab Episcopo.

22. Quot sint Parochiae: an in eis servetur Sacrosancta Eucharistia, et cum qua decentia.

23. An habeant fines certos, et propriam Ecclesiam : et quot Capellae inveniantur in districtu uniuscujusque Parochiae.

24. An aliquae Parochiae sint addictae Ordinibus Regularibus, et quibus.

25. An Parochi habeant Sacerdotes, qui eos adjuvent in cura animarum.

26. Exprimatur numerus, et qualitas Catholicorum in singulis quibusque locis degentium.

27. An sint et quo numero scholae catholicae, et quot in iis instituantur.

28. An adsit Doctrina Christiana in lingua vernacula expurgata ab omni errore, et quatenus negative.

29. An sint et quo numero scholae acatholicorum et num catholici et quo numero illas adeant.

30. Exprimatur numerus Sacerdotum indigenarum, et exterorum.

31. Eorum patria, mores, munera, in quibus se exercent, et cujus utilitatis sint pro servitio Ecclesiae.

32. An hujusmodi Sacerdotes facultates habeant a Sede Apostolica, et cujus expensis vivant.

33. An inter istos inveniantur Alumni Sacr. Congregationis de Propaganda Fide: quinam sint: et an satisfaciant muneri suo.

34. Exprimantur etiam nomen, aetas, et qualitates Sacerdotum indigenarum, qui sunt extra Dioecesim: tum etiam adnotentur loca, in quibus morantur; quid ibi peragant; et an ex aliquo peculiari titulo teneantur inservire propriae Ecclesiae.

35. An sint etiam Clerici, et quot: quomodo, et ad quem titulum ordinentur ; ubi resideant ; et quid ab illis exigatur, ut ad Sacros Ordines promoveri possint.

36. An adsint Missionarii Regulares, quot, cujus Ordinis, et cujus Regionis.

37. An cuilibet Ordini sint assignati certi Districtus, et qua auctoritate.

38. Ubi resideant, quibus Superioribus subsint, et quot habeant domos.

39. An habeant Conventus formatos, vel duntaxat Hospitia, et in iis servetur Clausura.

40. An in communi vivant, et cum regulari observantia, vel habitent soli, et in domibus privatis cum saecularibus, et praecipue cum mulieribus.

41. In quo habitu incedant.

42. An admittant ad habitum et professionem sui Ordinis indigenas, et qua auctoritate.

43. An Regulares habeant facultates speciales, et an eas exhibeant Episcopo, antequam exerceant.

44. In quibus dependeant ab Episcopis.

45. Quibus mediis sustententur: an aliquid pro Sacramentorum administratione percipiant, et quae sit illorum fama.

46. An, et in quibus utile opus praestent pro salute animarum, et pro incremento Religionis.

47. An sit aliquis Monialium Conventus; cujus Instituti; qua auctoritate fundatus; et cujus curae et ministerio subsit.

48. An ibidem observetur vita communis, et an Moniales obstringantur Votis Solemnibus, Paupertatis, Castitatis, Obedientiae, et Clausura.

49. An sint in Dioecesi piae aliquae Fundationes, seu Legata Pia.

50. An reditus pro hujusmodi Legatis rite administrentur et Canones ea de re serventur.

51. Enumerentur omnes abusus, qui forte irrepserunt etiam inter Catholicos, sive circa Fidem, et Ritus, sive circa mores, vel administrationem Sacramentorum, Divini Verbi praedicationem, et cujusque alterius generis sint. 52. Exprimantur principales causae hujusmodi abusuum; et quomodo possint eradicari.

53. Num matrimonia rite contrahantur.

54. An a viginti circiter annis status Fidei Catholicae augeatur, vel potius decrescat, et qua de causa.

55. Tandem attente perpendat spirituales Christianitatis illius necessitates: eas distincte referat, mediaque proponat idonea ad praeteritos errores evellendos, et majorem Religionis profectum inducendum.

APPENDIX XVI.

[Ad. pag. 105, n. 173.]

FORMULAE LITTERARUM QUAS EPISCOPI APUD SE RETINERE DEBENT.

FORMA I.

Institutio Parochi.

Dilecto Nobis in Christo Reverendo N. Presbytero Dioecesis N. salutem in Domino.

Cum Ecclesia Parochialis N. quam Rev. Presb. N. illius ultimus et immediatus Titularis ac possessor, obtinebat per vacaverit et vacet in praesens; Nos, ne divinus cultus in dicta Ecclesia detrimentum patiatur providere volentes, auctoritate ordinaria et alias omni meliori modo, quo melius validiusque possumus, Tibi apud Nos de vitae et morum honestate aliisque laudabilibus probitatis et virtutum meritis multipliciter commendato, praedictam Ecclesiam Parochialem N. cum omnibus juribus et pertinentiis suis universis, per praesentes, conferimus et assignamus; in illaque Te cum juris plenitudine Parochum instituimus.

Monitum te insuper volumus ex speciali mandato nostro ut irreprehensibilem te praebeas et oves Tibi concreditas cognoscas, custodias, pascas verbo, exemplo, Sacramentis. Memineris Te in ista Paraecia administranda futurum participem et socium laborum, curae et pastoralis officii Nobis in universa Dioecesi commissi. Elaborabis propterea et contendes, ut populus cujus curam una cum Ordinario tuo geres, tamquam purum triticum, auxiliante divina misericordia, congregetur in horrea coelestia.

In quorum fidem, praesentes manu nostra signatas et

per Secretarium nostrum subscriptas, sigilloque episcopali munitas fieri jussimus.

Dilecto nobis in Christo Rev. Presbytero N. Salutem in Domino.

Ne Ecclesia Parochialis N. ob illius vacationem aliquod in divinis patiatur detrimentum, tibi munus Vicarii Spiritualis demandamus, et ut in praefata Ecclesia Parochiali officia omnia Parochialia, illud etiam assistendi occurrentibus matrimoniis, durante illius vacatione exerceas, his Nostris valituris donec Nobis visum fuerit, facultatem concedimus et impertimur: illud te admonentes et hortantes in Domino, ut quae Sacerdotibus et Parochis in Provincialibus ac Dioecesanis Synodis praescripta sunt, diligenter accurateque attendas et observes. In quorum fidem, etc. Datum apud N. ex aedibus Nostris Episcopalibus anno a Nativitate Domini mensis die.

De mandato Illmi et Rmi Dñi Episcopi.

LOC. SIG.

Secretarius.