mandement ; et chevauchèrent tant que la compagnie du comte de Dunois se trouva en la campagne de Noeufbourg; et ceux des comtes d'Eu et de Saint-Pol s'assemblèrent de l'autre costel près de la ville de Rouan. Incontinent après se partist le roy le Franche, accompagnié du roy de Cécille et autres devant nommés; et chevaucha jusques au Pont-de-l'Arche, où ceux de la ville vindrent devant lui, faisants grande joie de son advénement. Et lors envoya sommer ceux de la ville et cité de Rouan, par ses héraux, qu'ils eussent à lui rendre et mettre en son obéissance ladite ville. Mais les Anglois qui estoient dedans ne voullurent souffrir que les héraux baillassent leur sommation; ains respondirent qu'ils retournassent en grande haste; et sy feirent-ils, car ils avoient esté en grand dangier de mort. Le roy scachant les manières que les Anglois avoient tenu à ses héraulx, feit passer touts ses gens d'armes ledit Pont-de-l'Arche, dont estoit conducteur le comte de Dunois ; et les envoya devant la cité de Rouan, où ils furent trois jours en grande puissance, combien qu'il feit en ces trois jours orde (sale) temps et ennuieux de pluye; et y eurent les gens de guerre moult à souffrir, car ceux de dedans feirent sur seulx moult grandes saillies, où y eust moult de belles armes faictes; et y fust prins à l'une desdites saillies ung escuyer franchois, nommé le bastard Soubriers, par son cheval qui cheut dessous lui. Les seigneurs Franchois se meirent en bataille devant ladite ville, et envoyèrent

sommer par les héraux du roy pour la deuxiesme fois ceulx de la cité qu'ils se meissent en l'obéissance du roy; mais les Anglois ne voulurent souffrir qu'ils approchassent la ville, ne qu'ils parlassent au peuple; et ainsy s'en retournèrent comme les premiers. Et lors le comte de Dunois, voyant que nul de la cité ne faisoit semblant ne manière de vouloir rendre la ville, considérant aussi le temps et la saison qui estoit sur l'hiver, s'en retourna au giste ce tiers jour au Pont-de-l'Arche; et les gens de guerre allentour d'icelluy pont par les villaiges.

CHAPITRE XVII.

Comment les Franchois cuidèrent entrer en la ville de Rouan, par le moyen d'aucuns de la ville, mais le sieur Tallebot les reboutta, et en y eut plusieurs morts

EN ce temps, vindrent nouvelles au roy de Franche, lui estant au Pont-de-l'Arche, qu'aucaus de la ville de Rouan se mectoient sur la muraille d'icelle ville dedans deux tours, et là gardoien ung pan de mur, adfin que les Franchois peussent par là entrer en la ville. Si fust envoyé le comte de Dunois celle part avecques l'armée, pour entreprendre ceste besongne ; et incontinent se partirent les roys de Franche et de Cécille en,

deux batailles, dont l'une fust à la porte Beauvoisine, près de la justice, où estoient le sieur Cullant, le sieur Delval, les sieurs de Blanville et de Bureulx (Bureau), et de Jaloingnes, mareschal de Franche; et plusieurs autres; lesquels ne feurent pas à pied, fors seulement les archiers, qui ne se bougièrent de leur place. L'autre bataille fust entre les Chartreux et la ville, où estoit le comte de Dunois, lieutenant-général; les comtes de Clermont, de Nevers, d'Eu, de Sainct-Pol, le séneschal de Poitou, messire Robert de Flocque, bailly d'Evreux; et plusieurs autres chevalliers et escuyers. Il vint devers eux ung homme de la cité leur dire qu'il estoit temps d'entrer, et que chacun feit són debvoir. Et lors descendit à pied le comte de Dunois et tous ses gens; et marchèrent jusques à la muraille de la ville, où ils dressèrent ung peu d'eschelles qu'ils avoient entre lesdites tours, pour monter contremont le mur. Là feurent faits chevaliers, Charles de la Fayette, le sieur d'Aigreville, maistre Guillaume Cousinot, Jacques de la Rivière, bailly de Nivernois, Robert de Harenville, et plusieurs autres qui grandement feirent leur debvoir sur la muraille. Le sieur de Taillebot (Talbot), qui estoit sur le mur, et véant ce, atout grande compagnie de gens d'armes et de trails anglois, comme tout forcené, vint pour reboutter les Franchois, qui jà estoient partie montés sur le mur, lesquels très valliamment se combattirent; mais à la fin leur convint laisser la muraille et

guerpir (quitter) le champ, car ils estoient encoires trop peu montés. Et feit tant le sieur de Tallebot, par sa vaillance, qu'il fut maistre de la cité et des deux tours; et là feurent, que pris quə tués, environ soixante personnes, tant des Franchois que de ceux de la ville qui les aydèrent; dont les aucuns saillirent és fossés du haut des tours; les autres eschappèrent.

CHAPITRE XVIII.

De la prinse de la ville et cité de Rouan, sauf le palais et le chastel.

APRÈS que les Franchois feurent, ainsy que dict est, rebouttés par les Anglois jus de la muraille de la ville et cité de Rouan, et que les roys de Franche et de Cécille, qui estoient arrivés à Darnestal, veirent que la puissance de la cité n'estoit bien jointe ne unie avecques les autres de la ville qui s'estoient mis ès tours, ils s'en retournèrent au Pontde-l'Arche; et touts les gens de guerre et la puissance s'en allèrent logier par les villaiges sur la rivière de Saine. Le lendemain, ceux de la ville de Rouan, pour la grande poeur et frayeur qu'ils avoient eue de l'assaut, doubtants que la ville ne fust prinse d'assaut, et par ce pillée, désolée et destruicte, et aussi esviter l'effusion du sang, pour qui polroit advenir par la prinse d'icelle cité, en

voyèrent l'official d'icellui lieu et aultres au Pontde-l'Arche, devers le roy de Franche, pour avoir de lui ung sauf-conduit pour aucuns des plus notables gens d'église, nobles, bourgeois, marchands et autres de la cité, lesquels voulloient venir devers lui ou les seigneurs de son grand conseil, pour trouver et faire aucun bon traictié et appoinctement. Sy leur fust délibvré ledit saufconduit; et ce jour, atout leur sauf-conduit à la seureté du roy, vindrent, c'est assavoir pour ceux de la cité, l'archevesque dudit lieu avecques plusieurs autres, et pour le duc de Sombresset, gouverneur de par le roy d'Angleterre, de la duchié de Normandie, lequel estoit dedans Rouan, aucuns chevalliers et escuyers, au port de SainctOuen, à une lieue près du Pont-de-l'Arche; auquel port ils trouvèrent pour le roy de Franche, le comte de Dunois, le chancellier, le séneschal de Poitou, messire Guillaume Cousinot, et plusieurs autres. Illecques parlamentèrent longue et bonne piéche lés ungs avecques les autres, tant que l'archevesque et ceux de la cité feurent d'accord et contents de rendre la ville de Rouan, et la mectre en l'obéissance du roy de Franche, et en promirent faire leur debvoir, parmi ce que touts ceux de la ville et cité qui voldroient demourer, demoureroient atout leurs biens sans rien perdre, et qui s'en voldroient aller s'en iroient. Et ainsi se partirent les Anglois et Franchois, les ungs pour aller au Pont-de-l'Arche, les autres à Rouan; mais