les Anglois, et les trouvèrent en ung champ, près ung villaige nommé Fourmigny, entre Careton et Bayeux.

Quant les Anglois les appercheurent, ils se meirent en bataille, et envoyèrent quérir diligemment le susdit Mathago le jour qui fust le quinziesme jour du mois d'apvril, lequel s'estoit parti d'eux très le matin pour aller à Bayeux; pour lequel mandement il retourna incontinent; et feurent les Franchois et Anglois, par l'espace de trois heures, l'ung devant l'autre, en escarmouchant l'ung contre l'autre. Et cependant feirent les Anglois grands trous et fossés, devant eux, de terre, dagues et espées, adfin que si les Franchois les assailloient, qu'ils cheissent eux et leurs chevaux. Les Anglois avoient derrière leur dos, à un traict d'arcq et entre d'eux, grande foison de jardinages plains de pommiers, poiriers et autres divers arbres, adfin qu'on ne leur peut courrir sur le derrière. Cependant le seigneur de Richemont, connestable de Franche. le comte de Laval, le seigneur de Loheac, mareschal de Franche, le seigneur d'Orval, le mareschal de Bretaigne, le seigneur de Saint-Sévère, et plusieurs autres, jusques au nombre de trois cens lanches, et les archiers, faisoient diligence d'estre près desdits Anglois, chevauchèrent d'ung villaige nommé Estrievères, où ils avoient couché le soir, jusques à un moulin à vent au-dessus dudit Fourmigny; et là, à la vue des Anglois, se meirent touts en bataille et marchèrent en leurs ordonnances près

d'icelui Fourmigny, à ung guet ou à ung petit pont de pierre; et lors les Anglois doubtèrent et laissèrent le camp, et se reculèrent sur la rivière pour la mectre à leur dos. Voyant ce, le comte de Clermont, qui avoit de cinqà six cens lanches, avecques les archiers et sa compagnie, et le connestable de Franche, les assaillirent vigoureusement, et en la fin les desconfeirent autour d'icelle rivière. Et là feurent morts et occis, par le rapport des héraux, des prestres et des bonnes gens qui là estoient, trois mille sept cens soixante quatorze Anglois, et si feurent prins messire Thomas Kiriel, messire Henry Morbery, Janequin Basquiers, et plusieurs autres Anglois, jusques au nombre de douze cens ; et les morts feurent enterrés en quatre fosses. Mathago eschappa et s'enffuit à Bayeux; et aussi feit messire Robert Vere, et s'en alla à Caen; et en icelle bataille morurent, du costel des Franchois, de six à huit cens hommes seulement. Et poroient aucuns dire que ce fust grace de Dieu pour les Franchois qui euront ceste vicloire; car ils n'estoient en tout, par le rapport des héraux, qu'environ trois mille combattants, et les Anglois estoient de six à sept mille; et par ce peut apparoir assez la grace de Dieu sur les Franchois, lesquels s'y gouvernèrent bravement et vaillamment ; et entre autres, ceux de dessoubs l'estendart s'y portèrent honnorablement et honestement; et sy feirent ceux du connestable, les seigneurs de Montgary, de Saint-Sévère, et par espécial le séneschal de

Poitou; car les Anglois chargèrent l'effort sur ses gens et sur ceux du bailly d'Evreux, que gouvernoit le sieur de Mauny, tellement qu'ils gaignèrent du costé où ils estoient en bataille, deux coulevrines sur eux. Et lors le séneschal descendit à pied, et feit descendre ses gens; puis assaillit si durement les Anglois, qu'il les reboutta par l'ung des bouts de la bataille, la longueur de quatre lanches, et recouvra les deux coulevrines; et à ceste reboutte, morurent sept cents Anglois. Ce véants, les autres Franchois se portèrent si valliamment, qu'ils eurent la victoire, et leur demoura le camp; et là fust fait chevalier le comte de Chastre, frère du comte de la Marche; Godefroy de Valoingnes, frère du comte de Boulogne et d'Auvergne, et le sieur de Vauvert, fils du comte de Villars; le sieur de Saint-Sévère, le sieur d'Allanchon, et plusieurs autres.

CHAPITRE XXV.

Comme la ville de Vires et autres villes feurent mises en l'obéissance du roy de Franche; et du siége mis debvant la cité de Bayeux; et comme on l'assaillit par deux fois, et enfin fust rendue par composition.

APRÈS la desconfiture que feirent les Franchois sur les Anglois, à la bataille de Fourmigny, les seigneurs franchois allèrent mectre le siége devant

la ville de Vires. N'y fust gueres, car messire Henry de Morbery, qui estoit prisonnier, en estoit capitaine; si feit tant par composition, que les Anglois qui dedans estoient de trois à quatre cents, s'en allèrent, leurs corps et leurs biens saufs, dedans Caen. Après la ville de Vires rendue, le connestable de Franche, le sieur de Laval, et autres, qui estoient en leurs compagnies, se partirent et s'en allèrent vers le duc de Bretaigne, soubs qui ils estoient, lequel duc, avec la compagnie dessusdite, alla mectre le siége en personne devant Avranche, et le tint trois semaines; et cependant feit faire des grandes approches et feit battre la muraille d'engins, tellement, que ung nommé Lampot, qui en estoit capitaine, rendit icelle ville d'Avranche au duc de Bretaigne, et s'en alla, ung baston au poing tant seulement, et ses compagnons pareillement, qui estoient de quatre à cinq cents. Pareillement se rendit la place de Couloigne, qui est une forte place, et imprenable, tant qu'il y ait à manger; car elle est toute assise sur une roche en la mer, près du mont Saint-Michel. Ils étoient dedans de quatre-vingts à cent Anglois; lesquels s'en allèrent, leurs corps et leurs biens saufs, à Chierbourg.

Assez tost après la prinse de Vires, les comtes de Clermont, de Chastres, et aultres dé leurs compagnies, qui avoient tenu le siége devant Vires, allèrent mectre le siége devant Bayeulx; et se logerent és faulxbourgs du costel devers Carentan, les

comtes de Dunois, lieutenant genéral du roy de Franche, de Nevers, d'Eu; les sieurs de Cullant, grand maitre d'hostel du roy, et de Jalloingnes, son frère, d'Orval, de Bueil, et plusieurs aultres chevalliers et escuyers; et de l'aultre costel, ès faulxbourg des cordeliers, se logèrent le sieur de Montenay, conduiseur' des gens du duc d'Allenchon, Pierre de Louvain, Robert Corungam (Cunningham), et grand nombre de francs archiers. Le siége clos de tous costés, les Franchois battirent fort la ville de canons, bombardes et autres engins, par l'espace de seize jours continuellement ; et tellement l'oppressèrent de mines et trenchis, qu'elle estoit preste à assaillir. Mais le roy de Franche avoit pitié de la destruction de la cité, et ne le volut consentir; néanmoins sans leur congié ne sceu, et sans aucune ordonnance, d'ardeur que les gens de guerre avoient de gaigner, ils assaillirent la cité deux fois en mesme jour; et il y eust de belles armes faictes d'un costel et d'autre; et s'y portèrent de tout costé très valliamment ; et en y eust des morts des deux lez, tant des traicts, comme des couleuvrines; mais en la fin, les Franchois se retraierent sans rien faire, pour tant qu'ils ne l'assaillirent que d'ung costel, et sans ordonnance de leur capitaine ; et fust leur faute, car s'ils l'eussent assaillie par l'ordonnance des capitaines et de deux costels, sans faulte nulle elle euist esté prinse d'assault. D'icellui assault fust fort espouvanté le seigneur de Mathago, car il y cult tués de valliants gens anglois,