Hæc quota pars scelerum, quæ custos Gallicus Urbis Usque a lucifero, donec lux occidat, audit?
Humani generis mores tibi nôsse volenti
Sufficit una domus. Paucos consume dies, et
Dicere te miserum, postquam illinc veneris, aude. Quis tumidum guttur miratur in Alpibus? aut quis In Meroë crasso majorem infante mamillam ? Cærula quis stupuit Germani lumina, flavam Cæsariem, et madido torquentem cornua cirro? Nempe quòd hæc illis natura est omnibus una. Ad subitas Thracum volucres nubemque sonoram
Pygmæus parvis currit bellator in armis :
Mox impar hosti raptusque per aëra curvis
Unguibus a sævâ fertur grue. Si videas hoc Gentibus in nostris, risu quatiare: sed illîc, Quanquam eadem assiduè spectentur prælia, ridet Nemo, ubi tota cohors pede non est altior uno.. Nullane perjuri capitis fraudisque nefandæ Pœna erit? Abreptum crede hunc graviore catenâ Protenus, et nostro (quid plus velit ira?) necari Arbitrio: manet illa tamen jactura, nec unquam. Depositum tibi sospes erit. Sed corpore trunco Invidiosa dabit minimus solatia sanguis : At vindicta bonum vitâ jucundius ipsâ. Nempe hoc indocti, quorum præcordia nullis Interdum aut levibus videas flagrantia causis. Quantulacunque adeò est occasio, sufficit iræ. Chrysippus non dicet idem, nec mite Thaletis Ingenium, dulcique senex vicinus Hymetto, Qui partem acceptæ sæva inter vincla cicuta Accusatori nollet dare. Plurima felix Paulatim vitia atque errores exuit omnes, Prima docet rectum Sapientia: quippe minuti
Semper et infirmi est animi exiguique voluptas
Ultio. Continuò sic collige, quòd vindictâ
Nemo magis gaudet, quàm fœmina. Cur tamen hos tu
Evasisse putes, quos diri conscia facti
Mens habet attonitos, et surdo verbere cædit,
Occultum quatiente animo tortore flagellum?
Pœna autem vehemens ac multo sævior illis,
Quas et Cædicius gravis invenit, et Rhadamanthus
Nocte dieque suum gestare in pectore testem. Spartano cuidam respondit Pythia vates :
Haud impunitum quondam fore, quòd dubitaret
Depositum retinere, et fraudem jure tueri Jurando. Quærebat enim, quæ numinis esset Mens, et an hoc illi facinus suaderet Apollo? Reddidit ergò metu, non moribus; et tamen omnem Vocem adyti dignam templo veramque probavit Exstinctus totâ pariter cum prole domoque, Et, quamvis longâ deductis gente, propinquis. Has patitur pœnas peccandi sola voluntas. Nam scelus intra se tacitum qui cogitat ullum, Facti crimen habet. Cedo, si conata peregit? Perpetua anxietas nec mensæ tempore cessat, Faucibus ut morbo siccis, interque molares Difficili crescente cibo: sed vina misellus Exspuit; Albani veteris pretiosa senectus Displicet. Ostendas melius, densissima ruga Cogitur in frontem, velut acri ducta Falerno. Nocte brevem si fortè indulsit cura soporem, Et toto versata toro jam membra quiescunt ; Continuò templum, et violati numinis aras, Et, quod præcipuis mentem sudoribus urguet, Te videt in somnis: tua sacra et major imago Humanâ turbat pavidum, cogitque fateri.
Hi sunt, qui trepidant, et ad omnia fulgura pallent,
Proxima tempestas, velut hoc dilata sereno. Præterea, lateris vigili cum febre dolorem
Si cœpêre pati, missum ad sua corpora morbum Infesto credunt a numine: saxa deorum Hæc et tela putant. Pecudem spondere sacel Balantem, et Laribus cristam promittere galli Non audent quid enim sperare nocentibus ægris Concessum? vel quæ non dignior hostia vitâ? Mobilis et varia est fermè natura malorum.
Quum scelus admittunt, superest constantia. Quid fas
Atque nefas, tandem incipiunt sentire peractis
Criminibus. Tamen ad mores natura recurrit
'Damnatos, fixa et mutari nescia. Nam quis
Peccandi finem posuit sibi? quando recepit
Ejectum semel attritâ de fronte ruborem?
Quisnam hominum est, quem tu contentum videris uno Flagitio? Dabit in laqueum vestigia noster
Perfidus, et nigri patietur carceris uncum, Aut maris Ægæi rupem, scopulosque frequentes Exsulibus magnis. Pœnâ gaudebis amarâ Nominis invisi, tandemque fatebere lætus,
Nec surdum nec Tiresiam quenquam esse deorum.
PLURIMA Sunt, Fuscine, et famâ digna sinistrâ, Et nitidis maculam hæsuram figentia rebus, Quæ monstrant ipsi pueris traduntque parentes. Si damnosa senem juvat alea, ludit et hæres Bullatus, parvoque eadem movet arma fritillo. Nec melius de se cuiquam sperare propinquo Concedet juvenis, qui radere tubera terræ, Boletum condire, et eodem jure natantes Mergere ficedulas didicit, nebulone parente,
Et canâ monstrante gulâ. Quum septimus annus
Transierit puero, nondum omni dente renato,
Barbatos licèt admoveas mille inde magistros, Hinc totidem, cupiet lauto cœnare paratu Semper, et a magnâ non degenerare culinâ. Mitem animum et mores modicis erroribus æquos Præcipit, atque animas servorum et corpora nostrâ Materiâ constare putat paribusque elementis; An sævire docet Rutilus, qui gaudet acerbo Plagarum strepitu, et nullam Sirena flagellis Comparat, Antiphates trepidi laris, ac Polyphemus, Tum felix, quoties aliquis tortore vocato Uritur ardenti duo propter lintea ferro?
Quid suadet juveni lætus stridore catenæ,
Quem mirè afficiunt inscripta ergastula, carcer Rusticus? Exspectas, ut non sit adultera Largæ Filia, quæ nunquam maternos dicere machos Tam citò, nec tanto poterit contexere cursu, Ut non ter decies respiret? Conscia matri Virgo fuit: ceras nunc hâc dictante pusillas Implet, et ad mochos dat eisdem ferre cinædis. Sic natura jubet; velociùs et citiùs nos Corrumpunt vitiorum exempla domestica, magnis Quum subeunt animos auctoribus. Unus et alter Forsitan hæc spernant juvenes, quibus arte benignâ
Et meliore luto finxit præcordia Titan:
Sed reliquos fugienda patrum vestigia ducunt, Et monstrata diù veteris trahit orbita culpæ. Abstineas igitur damnandis: hujus enim vel Una potens ratio est, ne crimina nostra sequantur Ex nobis geniti; quoniam dociles imitandis Turpibus ac pravis omnes sumus; et Catilinam Quocunque in populo videas, quocunque sub axe: Sed nec Brutus erit, Bruti nec avunculus usquam. Nil dictu fœdum visuque hæc limina tangat, Intra quæ puer est. Procul hinc, procul inde puellæ Lenonum, et cantus pernoctantis parasiti.
Maxima debetur puero reverentia. Si quid
Turpe paras, ne tu pueri contempseris annos : Sed peccaturo obstet tibi filius infans.
Nam si quid dignum Censoris fecerit irâ
Quandoque, et similem tibi se non corpore tantùm
Nec vultu dederit, morum quoque filius, et qui Omnia deteriùs tua per vestigia peccet, Corripies nimirum et castigabis acerbo
Clamore, ac post hæc tabulas mutare parabis.
Unde tibi frontem libertatemque parentis,
Quum facias pejora senex, vacuumque cerebro
Jam pridem caput hoc ventosa cucurbita quærat? Hospite venturo, cessabit nemo tuorum.
Verre pavimentum, nitidas ostende columnas, Arida cum totâ descendat aranea telâ ; Hic leve argentum, vasa aspera tergeat alter; Vox domini furit instantis, virgamque tenentis. Ergò miser trepidas, ne stercore fœda canino Atria displiceant oculis venientis amici, Ne perfusa luto sit porticus; et tamen uno Semodio scobis hæc emendat servulus unus.
Illud non agitas, ut sanctam filius omni
Adspiciat sine labe domum, vitioque carentem?
Gratum est, quòd patriæ civem populoque dedisti,
Si facis, ut patriæ sit idoneus, utilis agris,
Utilis et bellorum et pacis rebus agendis.
Plurimùm enim intererit, quibus artibus, et quibus hunc tu Moribus instituas. Serpente ciconia pullos Nutrit, et inventâ per devia rura lacertâ : Illi eadem sumptis quærunt animalia pinnis. Vultur, jumento et canibus crucibusque relictis, Ad fœtus properat, partemque cadaveris affert.
Hic est ergò cibus magni quoque vulturis, et se Pascentis, propriâ quum jam facit arbore nidos. Sed leporem aut capream famulæ Jovis et generosa In saltu venantur aves: hinc præda cubili Ponitur inde autem, quum se matura levârit Progenies, stimulante fame, festinat ad illam, Quam primùm prædam rupto gustaverat ovo. Edificator erat Cetronius, et modò curvo Littore Cajeta, summâ nunc Tiburis arce, Nunc Prænestinis in montibus, alta parabat Culmina villarum, Græcis longèque petitis Marmoribus, vincens Fortunæ atque Herculis ædem, Ut spado vincebat Capitolia nostra Posides. Dum sic ergò habitat Cetronius, imminuit rem, Fregit opes; nec parva tamen mensura relicta Partis erat totam hanc turbavit filius amens, Dum meliore novas attollit marmore villas.
Quidam sortiti metuentem sabbata patrem, Nil præter nubes et cœli numen adorant; Nec distare putant humanâ carne suillam, Quâ pater abstinuit; mox et præputia ponunt: Romanas autem soliti contemnere leges Judaïcum ediscunt, et servant, ac metuunt jus, Tradidit arcano quodcunque volumine Moses. Non monstrare vias, eadem nisi sacra colenti ; Quæsitum ad fontem solos deducere verpos. Sed pater in causâ, cui septima quæque fuit lux Ignava et partem vitæ non attigit ullam.
Sponte tamen juvenes imitantur cætera: solam Inviti quoque avaritiam exercere jubentur. Fallit enim vitium specie virtutis et umbrâ, Quum sit triste habitu vultuque et veste severum.
Nec dubiè, tanquam frugi, laudatur avarus,
Tanquam parcus homo, et rerum tutela suarum Certa magis, quàm si fortunas servet easdem
Hesperidum serpens aut Ponticus. Adde quòd hunc, de Quo loquor, egregium populus putat acquirendi Artificem quippe his crescunt patrimonia fabris. Sed crescunt quocunque modo, majoraque fiunt Incude assiduâ, semperque ardente camino. Et pater ergò animi felices credit avaros, Qui miratur opes, qui nulla exempla beati Pauperis esse putat juvenes hortatur, ut illam Ire viam pergant, et eidem incumbere sectæ.
« AnteriorContinuar » |