Item da man zalt 1455 den nächsten mäntag nach der creutzwochen, da gieng man mit dem creutz all pfarr gen sant Vlrich für den neüen pabst. An demselben tag da ward der gross fanen am ersten tragen. Item er gestvnd ze malen xiv gulden, vnd das tuch vnd dye francen gestunden xx gulden. Item in malet ain maler, der hiess maister Mang, der hett auch gemalt dye taffel auf sant Vlrichs altar daruor, da man zalt 1446, dye selbig tafel gestånd xxiv gulden, sub Johanne Höhenstainer abbate.

Item da man zalt 1455 an sant Kylianus tag da nam der hochgeboren fürst hertzog Ludwig hertzog Heinrichs sun titulum pfaltzgraff peim Rein hertzog in obern vnd nidern Payren, das erwirdig gotzhauss sant Vlrichs vnd sant Afren gelegen in Augspurg genädigklichen vnder seinen schirem nam, vnd der schirem solt zehen iar besten, vnd er gab dess dem gotzhauss ainen guten versigelten brieff, vnd sy im auch ainen versigelten brieff mit irem des convents vnd auch des abbtes sigel, vnd dye beschirmung tætt er vmb kain gut, besunderlichen allain durch gotz willen, abbas Johannes Hœhenstainer.

Item da man zalt 1455 an dem montag nach sant Lorentzen tag, das was an sant Tiburcy tag, litera dominicalis E, da pran ain stat in Beham aus zu grund, dye hiess mit namen Prix, vnd verprunen vil leut. Item man hett erst ain gloggen gegossen, dye hett siben vnd sechzig zentner, dye ersprung ze aylf stucken von der hitz, es giengen fünf feuer mit ain ander in der stat auf.

Item da man zalt 1455 an ainem suntag nach sant Anthonis tag, der am freytag was, da hett des Granders tochterman hett ain knecht, der selb wolt lauffen an ainer stieg, vnd er trug ain hlosses messer in der hand vnd strauchet an der stieg, vnd stach sich selbs durch die gurgel, vnd starb auf der stund. Item das messer was ain dorffner.

1456. Item da man zalt 1456 an sant Pauls kærung abent, dess tag an ainem suntag was, da viel in sant Agnesen capellen ein altes hültzin crucifix herab, das oben auf ainem palken stund, vnd ain convers bruder, der hiess mit namen Stephan, der prach den got von dem creutz vnd fand hinden darin zehen grosse namhäfftigen stuck hailtums.

Item da man zalt 1456 an sant Agnesen achtet, da ward gemacht ain vbersilberts prustpild zu sant Digna haupt, das machet ainer ze Augspurg, hiess mit namen maister Vlrich, derselb hett auch gemacht vnd gehauen des abbts Kissingers grabstain vnd des abbts Heütters grabstain vnd auch des Vögelins grabstain. Item das prustbild gestund den kuster acht gulden.

Item da man zalt 1456 an sant Kunigunden tag in der vasten, der an ainer mitwochen was, vm zwölfe, da ward Michel Rem ain purger von Augspurg erstochen von ainem edelman, der hiess mit namen Hans von Schomberg, vnd was des selben mals der hertzogin diener zu Fridperg. Es geschach zwischen den zwayen lechprugken, vnd der Rem lebt nit lenger vntz biss man in her ein pracht in ain mül vor sant Jacobs tor, da starb er on alle Gotz recht. Item es geschach von alter feindtschaft wegen.

Item da man zalt 1456 am sampstag vor iudica in der vasten, da setzt man sant Digna leichnam wider in das grab hinder den fronaltar in ainem pleyin sarch, vnd das haupt behielt man heraussen in der sacrastei, vnd satzt sunst vil stuck hailtums mit sant Digna hin ein, vnd das hab ich Johannes Franck gesechen vnd bin dar bey gewessen, vnd das geschach vnder pabst Calixto dem dritten vnd Petro cardinali et episcopo Augustensis diocesis, was ainer von Schomberg, vnd abbt Johannes Höhenstainer, der zu der selbigen zeitt abbt was zu sant Vlrich, vnd bey diser geschicht was der gantz convent vnd sunst vil erber purger vnd layen.

Item da man zalt 1456 in der fasten an sant Gerdrauten tag, der an ainer mitwochen was, da viel ain armer holtzhacker hinder sant Margrethen in den Lech und ertrank, vnd er schwam hin ab piss zu dem stier pad, da fand man in vnd hub in herauss.

Item da man zalt 1456 am freytag vor dem palmtag, da ward gemacht der esel vnd der saluator darauf. Es schnaid in ain maister zu Vlm, dem gab man zehen gulden, vnd ain maler vasset in zu Augspurg, der hiess mit namen maister Jærg, dem gab man vii gulden. Item der maler liefs den wagen auch darzu machen.

Item da man zalt 1456 an dem palm abent da kam gen Augspurg ain legat von dem pabst vnd prediget das creutz an dye Türcken, vnd gar vil numen das creutz an sich. Item der legat was ain prediger münich vnd ain ertzbischoff.

Anno domini Mo. cccco. 56 in vigilia pasce ego fr. Johannes Franck ordinatus sum in dyaconum.

Item da man zalt 1456 an sant Marx tag, da starb Johannes de Carniola vnd was fünf tag gelegen, vnd als man im dye haillikait gab, da was sein bruder Hainricus de Carniola der prior auch darbey, vod alsbald man seinen bruder versach, da leget sich der auch nider, vnd lag auch fünf tag vnd starb. Item sy hetten ainen prechen, sy waren auch zway zwilach, vnd sy hetten den orden des ersten gen sant Vlrich pracht.

Anno domini Mo. cccco. Ivj in vigilia sancte trinitatis hora septima dominicae (?) in capitulo electus est fr. Mathias Summerman in priorem per abbatem totumque conuentum, isque fuit inutilis prior vt patuit.

Item da man zalt 1456 am freytag nach vnsers herren fronleichnamstag, da erhänckt sich ain fraw selbs duntten an dem Lech in ainem haufs oberhalb des Schwals.

Item da man zalt 1456 an sant Petronellentag frů zwischen vieren vnd fünfen, da viel zu Werd der ain tail der mauren an vnser frawen kirchen gantz ernider, dye hett man erst des selbigen iars von newem auf gepauet.

Item da man zalt 1456 da macht man dye tafel auf den frümess altar, dye gestund cccc. gulden, vnd macht sy maister Hans von Ketz.

Item da man zalt 1456 an sant Onoffrius tag vnd pey acht tagen darnach an ain ander, da sach man ain stern, den man nent in latein cometam, der hett ain schwantz in der leng ains menschen, vnd der selbig stern was nit lautter als ander stern, sunder man sach in als ain prinede fackel durch ain glas. Item der stern erschin in der praitte als ains menschen hand, vnd der schein oder schwantz was auch in der varb als der stern. Item er hencket den schwantz gen mittem tag, vnd doch ain wenig auf dye gelingken hand oder seytten.

Item da man zalt 1456, da kamen zwen menschen von des türckischen kaiffers herr, dye waren etwan Kristen gewesen, zů Huni ienisch 10) dem gubernierer zu Vngern, vnd gwarneten in vnd sagten, wie dy Dürgken hætten zu samen gefchworen, sy wölten all das leben verliessen, oder sy wölten kriechischen Weyssenpurg 11) gewinen. Da schickt Huni ienisch haimlich auf der Tunaw hinab 40 tausent fusgengel, vnd er ritt hinab mit taussent pferden, vnd kamen haimlichen in dye stat, vnd an sant Maria Magdalena frů da rantten dye Türcken dye stat an, vnd ain zeügk kam in dye vorstat, vnd dye Kristen erschlugen den selben zeüg. Die Türgken schicktend den andern zeüg, den geschach auch also. Der dritt wurd auch nachend gantz erschlagen. Nun mügt ir hören, was der gaistlich vater Johannes Capistranus tät. Er stund ain hohen zinnen der statmaur, vnd röcket das crucifix auf in dye höhe vnd schray laut mit wainder stim vnd sprach: „O mein got, o Jhesu, wa send dein alt barmhertzigkait, kum vns zu hilff, verzeüch es nit, kum vnd erledig dye du mit deinem plut hast erlöst, kum vnd saum nit, das dye nit sprechen, wa ist ir got." Item der streitt weret vil stund, vnd dye Türgken flochend vnd wurdend ir zwai taussend erschlagen. Es schrib Huni ienisch, das ir so vil erschlagen wurden, das nyemant dye zal müg gewissen. Er eylet in acht meyl nach, vnd dye Kristen waren als begirig, das sy under wegen weder silber noch gold noch speiss achtend vnd liessend alle ding liegend. Item man num dem Türcken zwelff seiner grössten püchsen vnd gar vil gutes zeugs, vnd sunst zway hundert gemainer püchsen, vnd all sein pest edelman wurden im erschlagen in der raiss, vnd

११

10) Joh. Hunyad (Corvinus) der berühmte ungarische Held, 11) Belgrad, die ungarische Grenzfestung.

auch sein vicedum des lands, dess Got gelobt sey. Item da schrib es Huni ienisch Künig Latislao seinem herren da es geschach, vnd sturb darnach in kürtz.

Item da man zalt 1456 an sant Moritzen tag zogen hye von Augspurg lxxxij aus an dye Türcken, vnd darnach an sant Francissen tag zochen mer ccc vnd 40 aus all fufsgengel vnd woll geharnischt, aber dye stat verlegt sy nit besunder. Man samnet in auf dem hohen weg, vnd auch ettlich zugen auf ir aigen gelt, dies vermochten. Sy komen alweg vor gen sant Vlrich, vnd nomen vrlaub. Item vnder den 40 vnd ccc wasen x priester, münich von predigern vnd von parfusen vnd laypriester, vnd ain laypruder von sant Vlrich vnd sunst des abbts knechts woll fünf, all gekreützigt. Item dye von Neurenberg schicktend xiij hundert man an dye Türgken all gekreützigt, vnd vor weichennächten kamen sy all herwider vnd hätten nichts geschaft, denn das sy hetten das gelt

verzert.

Item da man zalt 1456 an sant Seuerini tag, der was an ainem sampstag, da starb der gaistlich vater Johannes Capistranus in Ungern, vnd ligt in ainer stat haist Sulach. Item darnach lecht über drey wuchen, da schlug der gubernator in Vngern, der da des Huni ienisch sun was, den grafen von Cili den kopf ab an seiner herberg, vnd fieng künig Latislaon seinen herren, der künig in Vngern vnd Beham was vnd hertzog in Oesterreich. Er nöttet den künig, das er den creützern must vrlaub geben; also schieden sy all von danen, man mainet, das anderthalb hundert tausent creützigter in Ungarn lagen. Item man mainet, das woll ij tausent menschen iu dem hör hungers vnd durstes sturben, gläbig menschen.

Item des selben mals da starb der türkisch kayser, vnd sein sun ward gewaltig an seiner stat, vnd zoch mit seinem volk wider hindersich nein in dye Türckey, vnd verprant seins aigens lands woll bey hundert meyl langk nach im alles das, das da was.

Item da man zalt 1456 an sant Ciriaci tag, da weichet