Hollande, Zélande et de Namur; marquis du Saint-Empire, sieur de Frize, de Salins et de Malines, et avec ce possessoit des pays de Picardie, Amiénois, Vermandois, Ponthieu, Boullenois et autres pays; et par espécial les choses advenues de la cognoissance de moy, Jacques Du Clercq, escuyer, sieur de Beauvoir en Ternois, fils de maistre Jacques Du Clerc, licentier ès droits, conseiller dudit Philippe duc de Bourgongne, en la chastellenie de Douay, Lille et Orchies, demeurant à Lille; desquelles je, Jacques Du Clercq dessusdit, demeurant en la cité d'Arras, en ma maison nommée le Monnoye, ay enquis au mieux que j'ai sceu et peu, et les ay mis par escript au plus vray que j'ay sceu et peu Et. certifie à touts que je ne l'ay fait pour or, ne pour argent, ne sallaire, ne pour complaire à prince quy soit, ne homme ne femme quy vescut.

Mais l'ay fait en manière de passer le temps, et adfin que ceux à venir puissent veoir les choses passées, et prendre exemple aux choses de vertu et fuire celles de vices; ne voullant aussy favoriser ne blasmer nul à mon pouvoir, fors seulement desclarer les choses advenues. Et prie à tous princes, chevalliers et seigneurs, que sy j'ay en ce mis chose quy les desplaise, que sur moy ne le veullent imputer à mal, car je ne l'ay fait à nulle intention de nuire ou vitupérer personne, ny par hayne; et aussy s'il y a quelque chose qui plaise, ne m'en soit sceu gré, car je ne l'ay fait pour avoir leur amour, ny pour leur complaire, ny à intention de les amender. Et combien que ce n'est pas tout ce que j'ay escript des choses advenues, et n'est seulement que des choses advenues durant le temps dessusdit qui dura jusà la mort d'icelluy Philippe-le

ques

Grand, duc de Bourgongne, desquelles choses j'ay compilé ce présent livre ; et des choses depuis advenues, j'ay intention d'en faire ung aultre volume ou deux, selon ce que je vivray, ou qu'il adviendra des choses en mon temps.

CY COMMENCHENT LES FAITS ADVENUS TANT AU ROYAULME DE FRANCHE COMME AILLEURS ET PAR ESPÉCIAL ÈS PAYS DE PHILIPPE DUC DE BOURGONGNE, COMMENCHANT EN L'AN DE GRACE ET INCARNATION DE NOSTRE-SEIGNEUR MIL QUATRE CENT QUARANTE-HUIT, ET FINANT EN L'AN MIL QUATRE CENT SOIXANTE-SEPT, QUE ICELUX DUC MOURUT.

CHAPITRE PREMIER.

Comment les Anglois prindrent Fougières, en Bretaigne; et des seigneuries que les Anglois possessoient en Franche.

EN l'an de l'incarnation de Nostre-Seigneur JésusChrist mil quatre cent quarante-huit, durant les tresves d'entre Charles, roy de Franche, septiesme

de ce nom, et Henry VI, roy d'Angleterre, fils du roy Henry, et de Catherine de Franche, sœur au roy Charles dessusdit, prindrent d'eschelles et par emblées, les Anglois, les ville et chastel de Fougières, situés en la duché de Bretaigne, à l'entrée de Normandie, laquelle duché de Normandie, de Guienne, et d'autres moult grandes seigneuries au royaume de Franche, icelluy roy d'Angleterre possessoit. Icelluy roy d'Angleterre avoit environ vingt-huit ans, et en son age de huict à dix ans, par les guerres et divisions qui avoient esté au royaulme de Franche, avoit esté couronné roy de Franche à Paris, par les grandes conquestes, persécutions et batailles que le roy Henry son père y avoit faits, par lesquelles il avoit conquis une partie du royaume, et en avoit déboutté le roy Charles VI, aisné, qui plus n'avoit de fils. Et sy le roy Henry eust survécu Charles VI, son beau-père, il eust appréhendé tout le royaume; lequel royaume lui avoit esté donné par icelluy Charles VI. Mais, par la pourvoyance divine, qui ne voullut souffrir que le droit héritier du royaume de Franche fust privé de son héritaige, le roy Henry d'Angleterre, environ quarante-huit jours avant que le roy Charles VI mourust, vint à clorre son dernier jour, et mourut au bois de Vincennes, emprès Paris, délaissant le roy Henry dessusdit, son fils d'ung an ou environ. Après laquelle mort du roy Henry et du roy Charles VI, Charles, fils dudit Charles, daulphin de Franche, alla à puissance d'armes,