et grée le vendage dessus dict; et at promis et promet la dicte Margueritte, par sa foi corporelment donée, que elle contre le vendage dessus dict ne irast, ne ferast aleir, ne riens n'i reclamerat à nul jour maix, ne pour doaire, ne por aultre raison en cause queile qu'elle soit. Et at promis et promet li dis Jehans sor l'obligement de tous ces biens mobles et non mobles, presens et avenir, où qu'il soient et puissent estre trovey, à warentir le vandage dessus dict ads dites dames de Sainte Hoult comme son franc alluel, et en franc alluel vers toutes gens qui à jour et à droit en voulroient venir. Et de ce à tenir fermement se est submis li diz Jehans en la juridicion nostre signor le conte de Bar. Et por ce que ce soit ferme chose et estable, je Thiebaus, doiens, je Pierres Caboche, et je Pierres, bourgiois de Bar dessus dict, à la requeste dez dis Jehan Sairant et de Marguerite, sa feme, avons mis le seel de la dicte contei de Bar en ces presentes lettres, saulf le droit nostre signor le conte de Bar et l'aultrui. Ce fut fait l'an de grace mil dous cens quatre vins et sept, en moix de fevrier, le mardi après les brandons.

XXX1.

1301 (n. st.), janvier.

Lettre des homes et des femes que les dames de Sainte Hoult acqueterrent à Buxi, à monsignour Gerart Brongnon, chevalier.

Je Thiebaus, doiens de Bar, je Jehans de Amenty, et je Pierres de Nuefville, bourgiois de Bar, gardour dou seel de la contey de Bar, faisons cognoissent à tous que mes sires Gerards Broingnons, chevaliers, establis ein propre persone par devant nous, at recogneu que comme il eust et tenist de son franc aluef, à Buxi, homes, femes, et lor enfans, et lor biens, comme sires, c'est assavoir: Colet, Emmeline et Jehanne, enfans Oudet qui fut; Hauwy seror la dicte Houdet; Thomassin, Jehan et Heluy, enfans la dicte Hauwy; Raulin, Demengin et Jehan,

1 Original, collection Servais; aujourd. Arch. de la Meuse.

enfans Emmeline dessus dicte; Gerardin, Domengin, Jennin et Marie, enfans Husson qui fut; Colet et Husson, enfans Heluy qui fut; Hauwyiette, feme Husson, le fil Houdet; Colin, fil Ternuy, et ces trois enfans; les dous enfans Jehan, le fil Lembert, et Paruy, dou Petit Louppey, demorant à Buxi. Assavoir est que li dis Gerards Brongnons, chevaliers, at vendu, quitei, et otroié à l'abbasse et au convent de Sainte Hoult, de l'ordre de Cytelz, de la dyoceise de Toul, à tenir en perpetuel heritage à elles et à lor successeresses, à tous jours, les homes, les femes, les anfans ci dessus nommeiz, les hoirs qui isceront d'eaus, et lor biens, et tout ce entierement que li dis Girars, chevaliers, at, puet et doit avoir à Buxi, et en appartenences en quelque chose que ce soit, sens riens à retenir, saulf ce, que li dis Paruis et sui bien ne sunt mie de cest vendage; les queilz biens li dis Paruis ne pourra acroitre à Buxi et ens appartenences, se ce n'est par lou grey et par l'otroi de l'abbasse et dou convent de Sainte Hoult dessus dictes, ne ne pourra vendre riens de son heritage à Buxi et en finage de Buxi, fors que ads homes l'abbasse et le convent dessus dictes. Et est faiz li vendages des choses dessus dictes por la some de trente livres de petis tournoix, monoye coursable, que li dis Gerars, chevaliers, at eu et receu dez dictes abbasse et convent, et s'en tient por bien paiés. Et renunce ad ce li dis Gerards qu'il ne puisse dire ne desnoiier qu'il n'ait eu et receu dez dictes abbasse et convent les dites trente livres, ein bons deniers compteiz et numbreiz. Des queilz homes, femes, enfans, et tous aultres biens dessus dis, contenus en ce vendage dessus dict, li dis Gerards, chevaliers, c'est desvestus, et dessaizis, et en ast envesti et mix en saizine et en corporel possession les dictes abbasse et convent par la baillance de un festu, et par la delivrance de ces presentes lettres. Et at promiz li dis Gerars Brongnons, chevaliers, pour lui et pour ses hoirs, sub l'obligement de tous ses biens mobles et non mobles, presens et avenir, où que il soient et puissent estre trouvey, à warentir ads dictes abbasse et convent et à lor successeresses, comme franc aluef, les homes, les femes, les enfans, lor hoirs qui isceront d'aulz, et les biens dessus dis, contenus en vendage dessus dict, à tous

jours, envers toutes gens jusques à droit; et de ce à tenir fermement sens aleir contre à nul jour mais, c'est submis li dis Brongnons, chevaliers, en la juridiction et en contreingnement nostre signor le conte de Bar. Et por ce que ceste chose soit ferme et estable, je Thiebaus, doiens, je Jehans de Amenty, et je Pierres, bourgiois dessus dict, à la requeste de monssignour Gerart Brongnon, chevalier dessus nomey, avons seellées ces presentes lettres dou seel de la dicte contey de Bar, saulf le droit nostre signour le conte de Bar et l'aultrui. Et por avoir plus grant seurtey des choses dessus dictes tenir fermement, je Gerards Brongnons, chevaliers dessus nomeis, ai mix mon seel dou queil je use, avec le seel de la contey de Bar, en ces presentes lettres, qui furent faites l'an de grace mil et trois cens, ein mois de janvier.

XXXI.

1303 (n. st.), 2 avril.

Lettre de vj. sextieres de moulture, que dame Poince dou Bouchon et Miles de Bullainville, ou lor hoir, doient ads dames de Sainte Hoult, à panre sor le molin de Bucey, le jour de feste saint Remey.

Je Thiebaus, doiens de Bar, je Jehans d'Amenti, et je Pierres de Nuefville, bourgiois de Bar, gardour dou seel de la contei de Bar, faisons cognoissent à tous que comme li abbasse et li convens de Sainte Ahoult demandessent à ma dame Poince dou Bouchon, feme mon signour Arnoult de Buxei qui fuit, et à Milet de Bullainville, escuier, un mui de bleif à panre et à recevoir sor lor molin de Bucey chascun an, paix en est faite par devant nous par le consoil de bones gens, à ceste fin que li dit dame Poince, et Miles, et lor hoir, paieront et delivreront à tous jors maix, chascun an, sur le dict molin à l'abbasse et au convent de Sainte Hoult seix setieres de moulture, le jour de feste saint Remey, en chief d'octobre. El ont promis et promettent li

dit dame Poince et Miles, por eulz et por lor hoirs, sur l'obligement de tous lor biens mobles et non mobles presens et avenir, où que il soient et puissent estre trovei, à paier ads dites. abbasse et convent les seix sextieres de moulture dessus dis, chascun an, au termine devant dict. Et de ce à tenir, à faire, et à gardeir fermement, s'en sunt submis li dit dame Poince et Miles, por eulz et por lor hoirs, en la juridicion et en constrengnement nostre signor le comte de Bar. En tesmongnage de la queil chose et por ce que ferme soit et estable, je Thiebaus, doiens, je Jehans de Amenty, et je Pierres, borgiois dessus dit, à la requeste ma dame Poince et de Milet dessus nomeiz avons mis le seel de la dicte contei de Bar en ces presentes lettres, salf le droit nostre signor le conte de Bar et l'aultrui. Ce fuit fait l'an de grace mil trois cens et dous, le mardi devant Pasques.

XXXII.

1294, 5 novembre.

Lettre de l'achainge qui touche au deyme de Mucey contre j. molin que li abbasse et convens de Sainte Hoult firent à Waulterin, escuier de Longeville, et à ses freires.

Je Thiebaus, doiens de Bar, je Jehans d'Amenty, et je Pierres de Nuefville, bourgiois de Bar, gardour dou seel de la contey de Bar, faisons savoir à tous, que Joffrois de Longeville, escuiers, et Waulterins, ses freres, establi en propres persones par devant nous, ont recognu que il ont otroiei et achangié à l'abbasse et au convent de Sainte Hoult, à tenir an heritaige permenablement à tous jours la tierce partie des menus deymes que il ont, pueent, et doient avoir à Muscey, en finage, en parrochage, et as appartenences de la dicte ville de Muscey, en recompensation et en achange de la quarte partie dou molin à Choiseil qui siet entre Herize la Brulée et Ronne, qu'estoit à l'abbasse et au convent de Sainte Hoult dessus dis, la queile quarte partie dou dict molin li dict Joffrois Walterins et lor

hoir tenront heritablement desor en avant à tousjours. Et ont promis li dict Joffrois et Waulterins, por eus et por lor hoirs, sor l'obligement de tous lor biens mobles et non mobles presens et avenir, où que il soient et puissent estre trouvey, à garentir as dictes abbasse et convent la dicte tierce partie dez menus deymes et des appartinences qu'il ont à Muscey, à tous jours en vers toutes gens jusques à droit; et de ce à tenir fermement se sunt submis li dit Joffrois et Waulterins en la juridiction nostre signor le conte de Bar. En tesmongnaige de la queil choze, por ce que ferme soit et estable, je Thiebaus, doiens, je Jehans d'Amenty, et je Pierres, hourgiois dessus dict, à la requeste dez dis Joffroi et Waulterin avons seellées ces presentes lettres dou seel de la dicte contey de Bar, sauf le droit nostre signor le conte de Bar et l'aultrui. Ce fut fait l'an de grace mil dous cens quatre vins et quatorze, le venredi après feste de Toussains, en moix de novembre.

XXXIII.

1285, 1er mai.

Lettre de v. biches de froment que Guios de Naives et sui hoir doient ads dames de Sainte Hoult, à la Saint Remey, à panre en son hosteil à Naives, viij. jors devant, ou viij. après.

Je Thiebaus, doiens de Bar, et je Pierres de Nuefville, bourgiois de Bar, gardour dou seel de la contei de Bar, faisons cognoissent à tous, que par devant nous establis en propre persone, Guios de Naives at recognu que il doit et est tenus à paier et à rendre à l'abbasse et au convent de Sainte Hoult cinc biches de froment, au preix dou minaige et à la mesure de Bar, chascun an, à tous jours, il, et sui hoir, ce de lui deffaloit, le jour de la saint Remey en chief d'octobre, ouyct jours devant ou oyct après, sens requeste et sens relevement, à panre et à recevoir le dict bleif en l'osteil le dict Guiot à Naives; lequeil bleif li dis Guios doit ads dames dessus dictes por la