soumettre au Conseil général de la Meuse, nous ne sommes rien moins qu'un élève en paléographie, mais un élève désireux d'apprendre et de s'instruire. Il nous tarde, en effet, de témoigner par de nouveaux et constants efforts, et non par de vaines paroles, notre profonde et sincère gratitude pour le haut témoignage de bienveillance et d'estime dont Messieurs les Membres du Conseil général de la Meuse ont daigné encourager nos modestes débuts.

1 Le Conseil général de la Meuse, dans sa délibération du 27 août dernier, sur la proposition de M. ROBERT DE MASSY, préfet du département, et sur le rapport de M. SALMON, conseiller honoraire à la Cour de Cassation, et membre du Conseil général, nous a accordé une gratification de cent francs, et a souscrit à vingt exemplaires de notre travail. (Volume du Conseil général de la Meuse, session d'août 1881, pages 171-172.)

DE

SAINTE-HOÏLDE.

CARTULAIRE.

CE SUNT LES LETTRES ET LES CHASTRES QUI TOUCHENT ET APPARTIENNENT ADS RENTES ET A LA FONDATION DE L'ECCLESE

DE SAINTE HOULT.

I.

1270 (n. st.), 3 avril.

Lettre monssignor Renault de iiij. muys froment à panre en terrages d'Ancerville.

Je Renaulz de Bar, chevaliers, freires à noble homme Thiebault, conte de Bar, fas savoir à tous ceulz qui sunt et qui seront, qui ces presentes lettres verront et orront, que je ai donney, oltroié et devisei por Deu et en aulmone, pour la remission de mes pechies, à l'ecclese des nonnains de Sainte Hoult en Barroix, de l'ordre de Citiaulx, et de l'eveschié de Toul, quatre muys de froment, au muy de Bar le Duc, pour la

pitance de lor convent, et pour faire leans chascun an perpetuelment mon anniversaire et le Marie1, ma feme, et les mes ancessors. Et doient panre le froment devant (dict) chascun an perpetuelment en nos terrages d'Ancerville, le jour de la feste Saint Martin en yver; et ce des terrages d'Ancerville deffaloit, je wel qui lor soit là delivreiz, ou en mon aultre terre que je ai en Barroix, en bleif ou en deniers jusques à la valour dou froment devant dict; et ceste aulmone, et ceste devise ai je faite par le grey et l'otroi et le creant de mon chier freire et signor Thiebault, conte de Bar, et de Marie ma feme. Et pour ce que ce soit ferme chose et estable, lor ai je donneyes ces presentes lettres salées de mon propre seel, qui furent faites et données l'an de l'Encarnation Nostre Signor mil dous cens sexante et neuf, on moix d'avril, le juedi devant Pasques florie.

II.
1251 (n. st.), janvier.

Lettre Perrin de Cirei et sa feme, de viij. muis et demei de bleif, moitié froment et l'autre avoinne, à panre en terrages de Leheicourt.

Je Thiebaus, cuens de Bar, fas savoir à tous qui ces presentes lettres verront, que Perrins Paillars de Cirei2 et Adeline sa feme ont doney, pour Deu et en aumone, perpetuelment, par la louz et par l'otroi de lor hoirs, à l'abbasse et au convent de Sainte Hoult, vvit muis et demey de bleif moitié froment et moitié avoinne, à la mesure de Condey, les queilz il avoient aquetteiz à la feme Rogier de Condey qui fut, et à ses hoirs, à panre chascun an en terrages de Leheicourt 3, et, ce il defalloit des terrages, on le panroit à Bar en mon grenier, en manière que li dict Perrins et Adeline sa feme tenront à lor vies tout ce que li convens de Sainte Hoult doit tenir à Port* et en finage, et après le décet dou dict Perrin ou de sa feme Adeline, cil qui

5

demorroit en vie, tenroit toute sa vie totes ces choses de Port et dou finage devant dictes, et en manière que la dicte abbasse et li convens de Sainte Hoult revenront à la lor chose de Port et dou finage après les desès des devant dis Perrin et Adeline sa feme, et le tenront quietement avec tout ce que il Perrins et Adeline i averont acru, soit en moble ou soit en heritage. Et por ce que ce soie ferme choze et estable, je de cui ces choses muevent, par cui louz et par cui oltroi ce est fait, ai mix mon seel à ces presentes par la requeste des parties, en tesmongnaige de veritey. Ce fut fait l'an de l'Incarnation de Nostre Signor mil cc. et cinquante ans, ein moix de janvier.

III.

1261 (n. st.), janvier.

Lettre de ce que les dames de Sainte Hoult tiennent à Chardongne de par monssignour Gerard de Labobe et dame Marguerite, sa feme.

Je Thiebaus, cuens de Bar, fas savoir à tous, que messires Gerars de Labobe chevaliers, et ma dame Marguerite sa feme ont vendu par mon grey et par mon otroi au dames de Sainte Hoult tout l'eritage qu'il avoient et pooient avoir à Chardongne, en homes et en aultres choses qui muet de mon fié, sens riens retenir. El por cest vendage ont receu li dict messires Gerars et Marguerite, sa feme, des davant dictes dames six vins et dix livres de fors, en deniers comptans. En tesmongnage de laqueil chose, je ai seellées ces lettres de mon seel, qui furent faites l'an de grace mil dous cens et sexante, ein moix de janvier.

IV.

1259 (n. st.), mars.

Lettre qui touche ads boix de Leheycourt.

Je Thiebaus, cuens de Bar, fas savoir à tous ceus qui ces presentes lettres verront et orront, que com bestens fuist par

devant moi, entre l'abbasse de Sainte Hoult et le convent d'une part, et les bourgiois de Leheicourt d'aultre, si comme de l'usuaire que ladicte abbasse et li convens demandoient et voloient avoir en tous les boix de Leheicourt pour lor molins de Leheicourt, il s'apaisarent par devant moi en teil manière, que la dicte abbasse et li convens panront et averont tous lor astovoirs en boix batis de la dicte ville de Leheicourt por lor dis molins de Leheicourt; ne on defois de la ville ne pueent aleir, ne riens reclameir, cela non où li communs de la ville ira. En tesmongnaige de la queil chose, je ai mix mon seel en ces lettres à la requeste des parties, qui furent faites l'an que li miliaires corroit par mil dous cens cinquante vvit ans, en moix de mars.

V.

1261 (n. st.), janvier.

Lettre de deix libvres à panre par devant,
en tonnieu de Bar.

Je Thiebaus, cuens de Bar, fas savoir à tous que por quatre livrées de terre en deniers que les dames de Sainte Hoult avoient chascun an en mes fours à Bar, que Perros dou Chemin lor avoit donney en aumone à tous jours, et pour un meu de bleif que je et li signor de Troisfontainnes lor deviens pour le boix de Jenneit, liqueilz meus de bleif me demoure quites, et pour cent souldées de terre en deniers que je lor avoie asseney en tonnieul à Bar pour cent souldées de terre en deniers que mes sires Warniers, chastelains de Monsons qui fut, lor avoit doney en aumone, à tous jours, ès rentes de Sommedieue, je lor doi chascun an, je et mi hoir, por ces choses devant dictes, dis livres, chascun an, à panre en devant dict tonnieu de Bar, avec quarente livres qu'eles i prannent chascun an que Henris cuens de Bar, mes peires, lor donnay en aumone. En tesmongnaige de laqueil choze, je ai seelées ces lettres de mon seel, qui furent faites l'an de grace mil dous cens et sexante, ein moix de janvier.