Nr. 1. Arnold Zauwelgin, Rolkin von Odendorp und Johann von Mauenheim pachten von der Stadt Köln deren Accise von der Ruthe auf zwei Jahre für eine wöchentliche Abgabe von 59 Mark. 1390, 2. Januar. Wir 1390 Allen luden, die desen brief solen syen of hoeren lesen. Arnolt Zauwelgyn, Roilkin van Odendorp ind Johan van Mauwenheym, Bruyns sûn, burgere zo Coelne, doin kunt und bekennen oevermitz desen brief, dat wir gepeicht ind gewünnen hain weder die ersame, wyse herren richtere, scheffene, rait und andere burgere der stat van Coelne yre assyse van der vytsierroiden 1) mit allen gewoenligen nütze, vervalle ind upkomyngen, die danaf komen soilen ind moegen, die upzobûeren und zo heven in der maissen ind voigen, as man die upzoheven ind zo bûeren plach, doe sy die in yrre hant hadden, und as dat up yrre stede rentkameren cleerligen geschreven steit, des sy uns copye haent doin geven, so wie wir die heven, bûeren ind halden zwey iair lanck solen na eynander volgende, die angiengen des sevenindzwentzichsten daigs in deme maende, den man zo latyne noempt december, nyest leden na noynen, ind hain yn ind yrre stede vurschreven darumb in guden truwen geloift und mit upgereckden vyngeren lyfligen zo den heilgen geswoiren, alle wechen umber up den gudestach zo geven, zo rychten ind zo betzalen up yrre stede rentkameren nuynindvunftzich marcke yrre stede payementz, as zerzyt der betzalingen genge ind geve is, also doch, oft up eyngen gudestach alsulch hogezyde were of vur unmoyssen off umb noit yrre stede yre rentmeistere zerzyt up der rentkameren dan nyet en syessen gelt zo heyven ind zo untfangen, dat wir asdan des anderen daegs, of so wanne alre yrste die rentmeystere syessen up der rentkameren gelt zo untfangen ind zo heven, dat vurschreven gelt gantz geven und betzalen solen, gelych wir gedain haven seulden, of man up der rentkameren gesessen hedde gelt zo untfangen, sonder damit zo doin weder unsen eyt vurschreven; ind so war wir des nyet en deden, des nyet syn en moesse, dat wir asdan meyneidich, truwelois ind sicherlois worden syn, ind man uns darvur 1) Die virgula oder Weinruthe, womit der Inhalt eines Fasses gemessen wurde. Die Verordnung darüber Mscr. IV, 46, Nr. 27. Vgl. Rathspr. Nr. 3, F. 52. |